Bei za mafuta ya petroli, dizeli na mafuta ya taa nchini zimepanda kwa mwezi Oktoba 2026, baada ya kushuka kwa miezi mitatu mfululizo, huku Serikali ikiweka mkazo katika kuhakikisha upatikanaji wa mafuta unaendelea kuwa wa uhakika na bei zake zinabaki himilivu.

Mamlaka ya Udhibiti wa Huduma za Nishati na Maji (EWURA) imesema ongezeko hilo limetokana na mwenendo wa bei za bidhaa za mafuta yaliyosafishwa katika soko la dunia, hali iliyosababisha bei za ndani kuongezeka ikilinganishwa na mwezi Septemba 2026.

Kwa mujibu wa taarifa ya EWURA, bei kikomo mpya za mafuta zitaanza kutumika Jumatano, Oktoba 7, 2026, saa 6:01 usiku, huku bei za rejareja zikitofautiana kulingana na bandari na mikoa.

Katika Jiji la Dar es Salaam, bei kikomo ya rejareja imewekwa Shilingi 4,057 kwa lita ya petroli, 4,086 kwa dizeli na 4,067 kwa mafuta ya taa. Tanga, petroli itauzwa kwa bei isiyozidi Shilingi 4,123, dizeli Shilingi 4,152 na mafuta ya taa Shilingi 4,133 kwa lita.

Kwa upande wa Mtwara, bei kikomo ya rejareja ni Shilingi 4,170 kwa lita ya petroli, 4,199 kwa dizeli na 4,180 kwa mafuta ya taa. EWURA imesema bei hizo zimezingatia mwenendo wa soko la dunia pamoja na gharama zinazohusiana na uagizaji na usambazaji wa bidhaa hizo nchini.

Wakati huo huo, EWURA imewakumbusha wafanyabiashara wa mafuta kuzingatia bei kikomo zilizotangazwa na kutotoza bei inayozidi kiwango kilichowekwa wala kuuza chini ya bei ya chini iliyoruhusiwa kwa mujibu wa kanuni. Aidha, vituo vinatakiwa kuonyesha bei za mafuta kwa uwazi ili kuwawezesha watumiaji kufanya maamuzi sahihi.

EWURA pia imewataka wauzaji wa mafuta kutoa stakabadhi za mauzo kwa wateja, zikiwa na taarifa muhimu ikiwamo jina la kituo, tarehe, aina ya mafuta na bei kwa lita. Hatua hiyo inalenga kuongeza uwazi, kuimarisha ufuatiliaji na kuwasaidia wananchi kutoa taarifa endapo kutakuwa na ukiukwaji wa bei zilizowekwa.