MAAFISA 13 wa uhifadhi na usalama wamekamatwa na Jeshi la Polisi nchini kwa tuhuma za kuhusika na vifo vya watu wanne waliokuwa wakisafirisha mkaa kwa pikipiki katika Wilaya ya Muleba, Mkoa wa Kagera.

Watuhumiwa hao wanajumuisha askari watatu wa Hifadhi za Taifa Tanzania (TANAPA), askari sita wa misitu kutoka Wakala wa Huduma za Misitu Tanzania (TFS) na maofisa wanne wasaidizi wa usalama.

Kwa mujibu wa taarifa iliyotolewa jana na Kamanda wa Polisi Mkoa wa Kagera, Blasius Chatanda, tukio hilo lilitokea Jumamosi majira ya saa 4:00 asubuhi kwa saa za Afrika Mashariki katika Kijiji cha Kanyamika, kando ya barabara ya Muleba–Biharamulo.

Imeelezwa kuwa eneo hilo lipo takribani kilomita 140 kutoka mpaka wa Tanzania na Uganda.

Taarifa ya polisi imeeleza kuwa maofisa hao walipokuwa doria ndani ya hifadhi ya misitu, walikutana na watu waliokuwa wakisafirisha mkaa kwa kutumia pikipiki 10.

Imedaiwa kuwa watu hao walikataa kukamatwa na kujaribu kuwanyang’anya maofisa hao silaha, hali iliyosababisha makabiliano yaliyosababisha vifo vya watu wanne.

“Watu hao walikataa kujisalimisha na walijaribu kuwanyang’anya maofisa silaha, hali iliyosababisha mashambulizi yaliyosababisha vifo vya watu wanne,” ilieleza sehemu ya taarifa hiyo.

Katika tukio hilo, polisi walikamata pikipiki 10, magunia 22 ya mkaa na mapanga matano, pamoja na vielelezo vingine vinavyohusiana na tukio hilo.

Aidha, walipata bunduki tatu aina ya AK-47 na gari la serikali lililokuwa limeharibiwa, huku vioo vya mbele na vya pembeni vikiwa vimevunjwa.

Hata hivyo, Kamanda Chatanda amesema uchunguzi unaendelea ili kubaini mazingira halisi ya tukio hilo na chanzo cha vifo hivyo.

Amewataka wananchi kuzingatia sheria na kuepuka kujichukulia sheria mkononi wanapokutana na polisi au mamlaka nyingine za utekelezaji wa sheria.

Tukio hilo limeibua mjadala kwenye mitandao ya kijamii, huku baadhi ya wananchi wakitaka hatua za uwajibikaji zichukuliwe na matokeo ya uchunguzi yawekwe wazi.

Mwezi Agosti mwaka huu, polisi pia waliwakamata askari watatu wa uhifadhi kaskazini mwa Tanzania baada ya mtu mmoja kufariki dunia na mwingine kujeruhiwa katika eneo la uhifadhi ambako walidaiwa kuingia kinyume cha sheria.

Kwa muda mrefu, mashirika ya haki za binadamu nchini yamekuwa yakieleza wasiwasi kuhusu madai ya ukiukwaji wa haki za binadamu unaohusishwa na operesheni za utekelezaji wa sheria katika maeneo ya uhifadhi.

Vile vile, imeelezwa kuwa uchunguzi wa tukio la Muleba unaendelea, na tuhuma dhidi ya maofisa waliokamatwa bado zinahitaji kuthibitishwa.